無論春夏秋冬，多倫多的湖邊幾時都係無敵的影相勝地。不過影來影唔係自己個靚樣就係湖邊的倒影，po相呃like長路總會都會有盡時。今日就教大家點樣可以影勁有feel嘅剪影相，等你輕鬆賺like啦！
1. 尋找適當的光源
話明係剪影，即係淨係影你個影，要造到呢個有強烈對比嘅效果，一定要搵一個強烈的光源，好多人特別會選擇日出或者日落呢啲時間，光線比較柔和之餘，後面影出嚟嘅顏色亦比較靚。當然，搵唔到可以睇日落嘅地方，以下嘅貼士依然可以幫你喺猛烈光線下，例如係正午的湖邊前面，影到一啲令人想睇多兩眼的相。
2. 以側面代替正面
主體的輪廓係剪影攝影好重要的元素，假如你將要影嘅剪影係人嚟嘅話，請你叫佢以轉向側面，咁樣可以影到人由額頭到鼻到下巴嘅輪廓，特別係女仔長長彎彎既睫毛都可以拍低哂，比起正面面向住鏡頭，淨係影到一個黑色的頭，側面拍出黎嘅剪影會有效果好多。
3. 利用身體線條帶出主體美
即使你已經轉咗做側面，以一張靚嘅剪影相嚟講係唔足夠的。攝影對象的動作亦會影響成張相嘅構圖。簡單嚟講，女仔可以自然地舉高手或者扮一啲跳舞既pose，帶出身體嘅線條美，令成張相再加分。
男仔就可以試下跳起或者做擴張啲的動作。
如果係情侶一齊影剪影的話，記住千祈唔好痴埋一齊，因為咁樣張相睇落去就淨係得一舊黑色嘅嘢喺度！但係兩個人踏後一步，面對面 (可以係少少身體接觸，例如男方托住女方的面或者女方環抱男方嘅腰)，等光喺你地中間透出嚟，張相都會靚好多。
4. 以環境及姿勢營造氛圍
要影一張好的相，背景的配合都好重要。例如陰暗的陽光會帶出悲傷嘅情懷，而強烈嘅太陽就適合影啲比較開心嘅相。因為剪影睇唔到個表情，所以我地要靠姿勢去配合，如果係開心嘅相就可以用頭先教咗大家跳起嗰啲，但如果嗰日想影啲比較有feel嘅相，就可以試下托頭或者動作細啲pose。