【多倫多華人歌手奮鬥史】由喪失說話能力到實現歌手夢想・霍栢銓 Eric

5,117

眼見多倫多Brampton市長大的Alessia Cara在今屆的格林美獎贏得最佳新人獎之後,頓感多倫多人要在演藝圈成名不是夢。因此亦觸發起我們想做一個多倫多華人藝人的專訪,看看他/她們在這個算是小數族裔的市場如何努力追尋星夢,發展演藝事業。

多倫多華人想入行的途徑還是有的:像新時代電視的多倫多華裔小姐競選、新秀歌唱大賽多倫多選拔賽,A1中文電台的都市巨聲或不定期的模特兒選舉。

多人.多事好榮幸邀請到霍栢銓 (Eric) 做系列的首個專訪。Eric是土生土長的多倫多人,一直在萬錦市居住。現正在多倫多大學修讀Music and Theatre Performance。2015年夏天參加新時代電視舉辦的「星秀動全城」獲得季軍,並獲得網絡最具人氣獎。

Eric於「星秀動全城」的參賽片段;Source: Youtube 截圖

Eric曾於小時候遇上嚴重的交通意外,經過多日的昏迷,甦醒後醫生曾告知他將無法再說話。不過人世間總有奇蹟的發生,就好似李斯特城都可以攞英超冠軍。Eric不只可以說話,更獲上天賜他一把靚絕的聲線。自此就萌生將這把失而復得的聲音分享給更多人的想法。

多:多倫多事小編     E:Eric

多:多倫多華人圈子唔算大,「星秀動全城」贏到三甲之後,其實有無演出機會?
E:都有嘅,好似多倫多主辦泛美運動會 (Pan-Am Games)開幕典禮、烈治文山音樂節 (Richmond Hill Music Festival)、渥太華音樂節 (Ottawa Music Festival),舊年都有幫旺市的中秋晚會獻唱,同埋有時出席新時代電視嘅表演。
多:機會都算幾多啦……好似仲開過自己嘅個唱添?
E:哈哈,小型演唱會啫,係喺舊年7月攪嘅……
多:利害嘅係,喺番Markham舉行。
E:因為喺度長大嘛!
多:平時上到台嘅感覺係點?
E:其實好有趣,好多時綵排果陣總覺得差啲差啲,上到台之後,總有一股動力,想將能量散發俾台下的觀眾,我諗因為咁,所以往往在正式表演的時候比練習要好一點。
多:有無諗過點樣可以喺唱功或舞台表演上再進步?
E:除咗努力練習之外,我會喺每次表演當中去搵一D自己做得唔夠好的地方,嘗試改變一吓方法,再俾心機去做好啲。仲有要保持好的體能,我以前有教游水,而家都有keep住每日游水,對表演都有幫助。
多:而家喺多倫多大學讀緊書?
E:係呀,修讀舞台劇同音樂,今年Year 4。
多:對事業有無幫助?
E:Eh….其實讀書理論較多,打好個音樂底子都好嘅,第日做唔成歌手,搵相關的工都好吖 (笑)!
多:講番轉頭,鍾意咩類型的音樂呢?
E:我鍾意民歌類的搖滾。除咗彈keyboard同結他外,我自己由細到大都鍾意吹笛。加拿大地方廣闊又靚,有時都鍾意自己一個人走去草地或涯邊吹笛,有一種refresh身心的感覺之餘,有時會啟發到一些新曲的靈感。


多:有無諗住返香港或者去中國或台灣發展?
E:有機會當然想啦,呢個真係要睇機遇。
多:咁如果咁啱睇多人・多事的朋友有從事藝人管理,大家不妨發掘呢位新秀喇!
E: 不過唔諗咁遠住,我而家除咗努力完成學業之外,會努力作吓歌,或者嘗試將別人的歌改編一下演譯方式,將中文歌改做英文歌詞 (畢竟都係英文地方嘛!) 希望無論是華人或本地人都可以認識一下Eric Fok。
多:靠社交媒體宣傳?
E:哈哈,當然喇,除咗可以同Fans溝通,都結識好多新朋友,我近來試唱的片段都有上載去我的IG。
多:咁大家記得Follow Eric的的Instagram: @ericfok_,感受一下呢位萬錦市土生土長,堅持追尋音樂路向,帶濃厚文青味的歌手喇!